الغضــب النبيــل
22 نوفمبر، 2010م
< صلاح حاج سعيد ...عرف بدبلوماسية عشقه (المسافي)..ان يجعل الحزن (نبيلا) ..حينما غني له مصطفى سيد احمد (الحزن النبيل).
< وصلاح حاج سعيد ..في دنيا العشق ..هو شاعر (مسافات)..ولسة بيناتنا المسافة.
< وفي (الحزن النبيل) هذا البرهان ..(ومشيت معاك كل الخطاوى الممكنة البقدر عليها وبعرفها).
< وقبل صلاح حاج سعيد ربما كان هناك سبق شعري اخر في نص يسكنه الابداع.
نحن ابنائك في الفرح الجميل
نحن ابنائك في الحزن النبيل
ونغني لك ياوطني
مثلما غنى الخليل
< ما يهمنا هنا هو انهم وصلوا الي مركب جعلوا به الحزن (نبيلا).
< ونحتاج اليوم الي نفس الفضيلة.
< نحتاج الي ان نجعلنا الغضب ...(نبيلا).
< نحن اليوم نحتاج الي ان نغضب ...اذا دخل لاعبو الهلال للملعب بدون (غضب) ..سوف تكون خساراتهم اكيدة.
< نعم ..نوصيكم بالغضب.
< ونسألكم ان يكون غضبكم (نبيلا).
< هذا سبيلكم للفوز على المريخ.
< اياكم والاستهتار ..او التهاون او استصغار المريخ.
< اياكم ان تأتوا بذاك الحشد الذي حشدناكم به ..ابتهاجا واحتفالا بالانتصار على المريخ.
< انسوا مباراة الخميس ..وتعالوا اليوم لتنتصروا.
< ليس امامكم خيار اليوم غير ان تنتصروا على المريخ لتجمعوا بين الممتاز والكأس.
< لن ترضي عنكم جماهير الهلال اليوم إلا اذا جمعتم لهم بين البطولتين.
< هذا موضوع لا يقبل النقاش.
< المريخ الان في الحالة المثلي لتفوزوا عليه.
< فقط مطلوب منكم ان تلعبوا بجدية ومسؤولية ..ألعبوا بدون استهتار او تهاون ..واحترموا المريخ للفوز عليه.
< لا تجعلوا حماس لاعبي المريخ يطغي عليكم ..اذ طغي حماسهم سوف ينتصروا عليكم.
< ربما يدخل المريخ اليوم المباراة بفرضية واحدة وهي الانتصار على الهلال.
< وربما تكون جراحهم اكبر ..خاصة اذا كان هناك تراخي من لاعبي الهلال.
< حافظوا على هبيتكم ...بغضبكم ..وبقوة احساسكم.
< يجب ان تنتصروا.
< يجب ان تعلموا ان انتصار المريخ عليكم لا قدر الله وهو في حالته تلك يعتبر كارثة.
< انتم في قمة الاستعداد ..وفي كاملية الجاهزية.
< اذن ما الذي يمنعكم من الانتصار على المريخ.
< من الذي يعصمكم عن ذلك.
< ليس هناك شيء يمكن ان يكون بينكم والانتصار على المريخ ..إلا تهاونكم ..وقلة غضبكم.
< لا نريد ان يكون غضب المريخ اكبر ..لتدفعوا انتوا فاتورة غضبهم هذا.
< لا نريد ان يكون الاستفزاز الشديد الذي تعرض له المريخ دافعا لهم للانتصار على المريخ.
< يجب ان يعلم لاعبي الهلال انهم خرجوا من بطولة الكونفدرالية.
< وان الفرح الموقت لجماهير الهلال يتمثل في هذه الحالات الدائمة باذن الله التي يفرضها الهلال على خصمه.
< اذن لا تجعلوا فرح جماهير الهلال بالفوز بالممتاز يتسلل مساء اليوم.
< نعرف ان كأس السودان بطولة ثانوية ..وهي لا قيمة لها ...لكن نفضل ان يفوز بها الهلال لأنها تأتي في ختام الموسم ..وهي تأكيد على جدارة الهلال بفوزه بالممتاز.
< نعم اني اوصيكم بالغضب.
< اوصيكم بالغضب الايجابي ..الغضب النبيل ..الذي يكون ضد كل شيء تمس بالهلال.
< الغضب الذي يرفض ان يخسر الهلال على ملعبه.
< يجب ان يعلموا لاعبي المريخ انهم يلعبون اليوم في (المقبرة).
< وان الدخول الي المقبرة يعني انهم لن يكونوا إلا (ضحية) في استاد الهلال.
< استاد الهلال لا يقبل بخصومه في ملعبه إلا (ضحايا).
< وقد جرب المريخ ذلك يوم الخميس الماضي.
< ويمكن ان نكرر العملية اليوم.
< ح نضحي تاني بالمريخ.
< تجيبوا (ساطور).
< ما بحلكم.
< تشتكوا (ميشو).
< ما بحلكم.
< تسفروا رمزي صالح.
< ما بحلكم.
< نحن (ضحيتنا) تاني بنضحي بيها.
< لو مرقتوا من (بشة).
< سادومبا ما بتمرقوا منو.
< طبعا سادومبا متخصص في مباريات كأس السودان.
< المرة الفاتت ..سادومبا جاب هدفين في المريخ في كأس السودان ..وفي هدف ثالث ..الحكم ما حسبو.
< وفي الجميعابي سادومبا جاب 9 اقوان.
< خلوا الليلة يجب هاتريك.
< ما عاوزين من سادومبا اكتر من تلاتة.
< لكن انا متأكد (بشة) بعد ما جرب شباك المريخ ..ما بخليها تاني.
< انتوا ما شفتوا ديمبا ..بقي في كل مباراة يلعب فيها ضد المريخ يجيب ليه قون.
< الحكاية دي ديمبا من شبيبة القبايل مصر عليها.
< اعملوا حسابكم من ديمبا ومساوي.
< وإلا اقول ليكم اعملوا حسابكم من خليفة.
< خليفة ذاتو ما ساهل.
< وفييرا.
< وبكري المدينة ..الذي اتوقعه بشكل شخصي ان يسجل اليوم.
< الهلال كلو بجيب قون.
< المعز محجوب ذاتو لو في (ضربة جزاء) خلوها ليه.
< تذكروا يا ناس الهلال ..ان مرمي المريخ يحرسه (محمد كمال).
< ما في كرم اكتر من كدا.
< ما في احسن من كدا.
< انتوا عاوزين شنو.
< محمد كمال يا كاريكا ..يحرس مرمي المريخ ..لا اظن ان هناك دافع اكبر من هذا للفوز على المريخ.
< دي فرصة ..اوعكم تضيعوها.
< دي فرصتكم.
< ليبيا فتحت.
< التسجيلات قربت.
< ح نطلع كشف (الشطوبات).
< طارق مختار ..(ابو بطانية) الامل عطبرة ..ليبيا ذاتها كتيرة عليه.
< النفطي (احد اعضاء الجواسيس الحمر) ..خلوه يتفرغ لي (جاسوسيتو)..الكورة كلموه يقنع منها.
< هيثم المرابط ..( لا بنفع جاسوس ولا بنفع لاعب كورة).
< من هنا بيتكم طوالي.
< سفاري (ابو ساطور) ..الاعارة الي ليبيا ..ولكن ذلك بعد تجريده من (الساطور).
< والله تمشي ليبيا بي (ساطورك) دا ...من الفاشر يرجعوك.
< محمد كمال ...شطب عديل.
< بلة جابر ..يمنح فرصة اخيرة.
< موسي الزومة ..احسن تريحوا (الكشافات) منو.
< انا اول مرة اشوف لي زول جاب للكشافات (قطايع).
< انت يا موسي الزومة (كشافات) الهلال دي نحن تعبانين فيها ..ما جايبنها (هدية) من الامارات.
< لاقي الكشافات (الهملة) دي وتهدف فيها...في استاد المريخ.
< انتوا بالمناسبة دي وين (كاسروكا).
< كاسروكا مين؟.
< كاسروكا بتاع سيكافا.
< كاسروكا ..الما بيلعب إلا وقت يفلقوه.
< انتوا بتنسوا وإلا شنو؟.
< هسع كاسروكا دا في النيل الحصاحيصا بلعبو.
< النيل الحصاحيصا ذنبو شنو؟.
< والشغيل.
< الشغيل مالو؟.
< الشغيل قال ماشي الهلال.
< يا الشغيل انت في الهلال ما بتلعب ...إلا تكون ناوي تغير نشاطك القدمي.
< يعني تبقي لاعب سلة.
< يمكن.
< لاعب طايرة.
< يمكن.
< لكن كورة القدم دي ما بنجاملك فيها.
< ولا بنكذب.
< انت ما شفت ناس بشة ديل بعملوا في شنو؟.
< عليك الله يا شغيل الليلة لو شفت (بشة) اتصور معاه ..فرصة زي دي تاني ما بتلقاه.
< الزول دا يمكن يمشي الدوري الايطالي.
< وانا عارفك ..انت مع اصحابك بتقول انا بشة دي كنت بلعب ضدو.
< بختك.
< دي طارق مختار ما بلقاها.
< طارق مختار دي ارحمو.
< تحت البطانية ما عاوزين تخلوا يا هلالاب.
< ملحوظة: هو البقعدو تحت البطانية شنو في (السخانة) دي.
هوامش
< اجلت الكتابة عن نوري ومحمد الحسن حسن سالم حميد ومحمد سعيد دفع الله لمساحات قادمة.
< دي عاوزة ليها (خصوصية) اكبر.
< اجمل ما في مباراة اليوم ان الهلال سوف يلعبها بدون ضغوط.
< هذا لا يعني ان تسقطوا (الغضب) من حساباتكم.
< ركزوا لي في (الغضب النبيل) دا.
< الجمهور برضو يجب ان يتشبع بالغضب النبيل ..شجعوا الهلال بحرارة ..وساندوا لاعبي الهلال..وما تشتغلوا بلاعبي المريخ.
< ممكن ان يتعرض لاعبي الهلال للاستفزاز ..ويمكن ان يكون هناك ظلم واضح من حكم المباراة..لكن برضو يجب ان يتحلى لاعبي الهلال بالصبر ..وألا يشتغلوا بما يحدث خارج الملعب.
< ألعبوا كورتكم فقط ..ولياقتكم ومجهودكم البدني والعقلي ما تضيعوه فيما يحدث في المدرجات ..او ما يمكن ان يكون من حكم المباراة.
< اذا لعب الهلال بفن وبغضب سوف يكون الانتصار على المريخ كبيرا ان شاءالله.
< خلوا بالكم من بكرى المدينة ..اليوم سوف يفعل الكثير.
< انت يا محمد كمال حظك كعب.
< وقعت مع بكرى المدينة.
< رمزي صالح اتخارج.
< انت يا اخوي رمزي في شنو؟.
< نفسي افهم ..انت سجلوك بي مليار ..عشان تطلع من الشبكة.
< حركتك دي محمد كمال ممكن يعملها.
< يعني ما عاوزة ليها جواز فلسطيني.
< هسع لو عكسة هيثم مصطفي حفظه الله ورعها طلعت ليها بي جوازك الفلسطيني ..كان مسكتها.
< ديمبا ما كان سألك.
< خلى جامعة الدول العربية تنفعك.
< يا زول جامعة الدول العربية ذنبها شنو؟.
< خبر عاجل : ودامت الافراح ..ان شاءالله.
الأحد أكتوبر 25, 2015 11:51 pm من طرف ملهم محمد احمد
» خبر سعيد ....
الإثنين مارس 25, 2013 10:00 pm من طرف مصطفى نور
» العزيبة ..........
الأربعاء مايو 30, 2012 12:40 am من طرف ابوابرار
» الاذاعة الرياضية FM 104
الإثنين ديسمبر 05, 2011 6:30 am من طرف Admin
» الصحف السياسيه
الجمعة ديسمبر 02, 2011 12:51 am من طرف Admin
» الصحف اليومية
الجمعة ديسمبر 02, 2011 12:38 am من طرف Admin
» المريخ يتوج بالدورى الممتاذ
الإثنين نوفمبر 21, 2011 4:03 pm من طرف غسان الخير
» صعود العزيبة سريعا لدرجة الاولى
الأحد نوفمبر 13, 2011 6:53 pm من طرف غسان الخير
» تكوين اللجنة الشعبية بالقرية
الإثنين سبتمبر 19, 2011 2:20 am من طرف وائل محجوب الفكي